କେନ୍ଦୁଝର ସାଇନ (ଜ୍ଞାନରଞ୍ଜନ ମିଶ୍ର): ଆଫଗାନିସ୍ତାନ ବିପକ୍ଷ ଏକମାତ୍ର ଟେଷ୍ଟରେ ଭାରତର ଦମଦାର ବିଜୟ ହୋଇଛି। ଏକମାତ୍ର ଟେଷ୍ଟ ମ୍ୟାଚ୍ର ତୃତୀୟ ଦିନରେ ଭାରତ ଆଫଗାନିସ୍ତାନକୁ ଏକ ଇନିଂସ ଏବଂ ୩୦୦ ରନ୍ରେ ପରାସ୍ତ କରିଛି । ଏହା ଟେଷ୍ଟ କ୍ରିକେଟ୍ରେ ଭାରତର ସବୁଠାରୁ ବଡ଼ ଇନିଂସ ବିଜୟ। ମାନବ ସୁଥାର ତାଙ୍କ ଡେବ୍ୟୁ ମ୍ୟାଚ୍ରେ ଭାରତ ପାଇଁ ଚମତ୍କାର ପ୍ରଦର୍ଶନ କରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ ।
ଭାରତ ପ୍ରଥମେ ବ୍ୟାଟିଂ କରି ୮ ଉଇକେଟ ବିନିମୟରେ ୫୬୪ ରନ୍ ସଂଗ୍ରହ କରି ଇନିଂସ୍ ଘୋଷଣା କରିଥିଲା । ତୃତୀୟ ଦିନରେ ଆଫଗାନିସ୍ତାନକୁ ୧୫୨ ରନ୍ରେ ଅଲ୍ଆଉଟ୍ କରିଥିଲା। ଏହା ଭାରତକୁ ୪୧୨ ରନ୍ର ଅଗ୍ରଣୀ ଦେଇଥିଲା । ଫଳରେ ଆଫଗାନିସ୍ତାନ ଫଲୋଅନ୍ ହୋଇ ଦ୍ୱିତୀୟ ଇନିଂସ୍ରେ ମାତ୍ର ୧୧୨ ରନ୍ ସଂଗ୍ରହ କରିଥିଲା। ଆଫଗାନିସ୍ତାନ ଦ୍ୱିତୀୟ ଇନିଂସ୍ରେ ୯ ୱିକେଟ୍ ହରାଇଥିଲା, କିନ୍ତୁ ଆସରାଫ୍ ବ୍ୟାଟିଂ କରିବାକୁ ଆସି ନଥିଲେ।
ଏହା ଭାରତର ଏକ ଇନିଂସ୍ ବ୍ୟବଧାନରେ ସବୁଠାରୁ ବଡ଼ ଟେଷ୍ଟ୍ ବିଜୟ। ଭାରତୀୟ ଦଳ କେବଳ ତୃତୀୟ ଦିନରେ ଏକମାତ୍ର ଟେଷ୍ଟ୍ ଜିତିଛି। ଭାରତ ଏବଂ ଆଫଗାନିସ୍ତାନ ମଧ୍ୟରେ ଏହି ମ୍ୟାଚ୍ ବିଶ୍ୱ ଟେଷ୍ଟ୍ ଚାମ୍ପିଅନସିପ୍ର ଅଂଶ ନଥିଲା । ତେଣୁ ଦଳକୁ WTC ପଏଣ୍ଟ୍ ଟେବୁଲ୍ରେ କୌଣସି ଲାଭ ମିଳିବ ନାହିଁ।
ଏହି ମ୍ୟାଚ୍ରେ ଭାରତ ପାଇଁ ଡେବ୍ୟୁ କରିଥିବା ସ୍ପିନର୍ ମାନବ ସୁଥାର ଚମତ୍କାର ପ୍ରଦର୍ଶନ କରିଥିଲେ। ସେ ପ୍ରଥମ ଇନିଂସ୍ରେ ୬ଟି ଏବଂ ଦ୍ୱିତୀୟ ଇନିଂସ୍ରେ ଗୋଟିଏ ୱିକେଟ୍ ନେଇଥିଲେ। ଦ୍ୱିତୀୟ ଇନିଂସ୍ରେ ଭାରତ ପାଇଁ ୱାଶିଂଟନ୍ ସୁନ୍ଦର ୪ଟି, କୁଲଦୀପ ଯାଦବ ୩ଟି ଓ ସିରାଜ ଗୋଟିଏ ଉଇକେଟ୍ ନେଇଥିଲେ।
ଏହି ମ୍ୟାଚ୍ରେ ଆଫଗାନିସ୍ତାନର ବ୍ୟାଟିଂ ଅତ୍ୟନ୍ତ ଖରାପ ଥିଲା। ପ୍ରଥମ ଇନିଂସରେ ରହମତ୍ ଶାହ ଏକମାତ୍ର ବ୍ୟାଟସମ୍ୟାନ୍ ଭାବେ ଅର୍ଦ୍ଧଶତକ ହାସଲ କରିଥିଲେ । ଦ୍ୱିତୀୟ ଇନିଂସରେ କୌଣସି ବ୍ୟାଟସମ୍ୟାନ୍ ୫୦ ସ୍କୋର କରିପାରି ନଥିଲେ। ଦଳର ବ୍ୟାଟିଂ ଏତେ ଖରାପ ଥିଲା ଯେ ଦ୍ୱିତୀୟ ଇନିଂସରେ କେବଳ ୩ ଜଣ ବ୍ୟାଟସମ୍ୟାନ୍ ଦୁଇ ଅଙ୍କ ଛୁଇଁ ପାରିଥିଲେ। ଆଫଗାନିସ୍ତାନ ପକ୍ଷରୁ ସେଦିକୁଲ୍ଲାହ ଅଟଲ ଦ୍ୱିତୀୟ ଇନିଂସରେ ସର୍ବାଧିକ ୪୨ ରନ କରିଥିଲେ। ଦୁଇ ଦଳ ଜୁନ୍ ୧୩ରୁ ଆରମ୍ଭ ହେଉଥିବା ୩ ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜ୍ ଖେଳିବେ।
