୬ ହଜାର ଟଙ୍କା ଲାଞ୍ଚ ନେବାବେଳେ ପାଟଣା ତହସିଲ କନିଷ୍ଠ ସହାୟକ ଗିରଫ

କେନ୍ଦୁଝର ସାଇନ (ଜ୍ଞାନରଞ୍ଜନ ମିଶ୍ର):ଜମି ମ୍ୟୁଟେସନ୍ ମାମଲାର ଫାଇଲ ପ୍ରକ୍ରିୟାକରଣ କରିବା ସହ ଆବେଦକ ଓ ତାଙ୍କ ଅନ୍ୟ ସହଭାଗୀଙ୍କ ନାମରେ  ଜମି ପଟ୍ଟା) ଜାରି କରାଇବାରେ ସହଯୋଗ କରିବା ପାଇଁ ୬ ହଜାର ଟଙ୍କା ଲାଞ୍ଚ ନେଉଥିବା ବେଳେ ପାଟଣା ତହସିଲ କାର୍ଯ୍ୟାଳୟର କନିଷ୍ଠ ରାଜସ୍ଵ ସହାୟକ ବି.ଏଚ. ଉମାଶଙ୍କର ଓଡ଼ିଶା ଭିଜିଲାନ୍ସ ହାତରେ ଧରାପଡ଼ି ଗିରଫ ହୋଇଛନ୍ତି।
ଭିଜିଲାନ୍ସ ସୂଚନା ଅନୁଯାୟୀ, ଅଭିଯୋଗକାରୀ ନିୟମ ଅନୁଯାୟୀ ନିଜ ଜମିର ମ୍ୟୁଟେସନ୍ ପାଇଁ ୩ ଜୁନ୍ ୨୦୨୬ରେ ଅନଲାଇନ୍ ଆବେଦନ କରିଥିଲେ। ପରେ ମାମଲାର ସ୍ଥିତି ସମ୍ପର୍କରେ ଜାଣିବାକୁ ତହସିଲ କାର୍ଯ୍ୟାଳୟରେ ପଚାରିବାରୁ କନିଷ୍ଠ ରାଜସ୍ଵ ସହାୟକ ଉମାଶଙ୍କର ଫାଇଲ୍ ପ୍ରକ୍ରିୟାକରଣ ପାଇଁ ୬୦୦୦ ଟଙ୍କା ଲାଞ୍ଚ ଦାବି କରିଥିବା ଅଭିଯୋଗ ହୋଇଥିଲା।
ଲାଞ୍ଚ ଦାବିରେ ଅସନ୍ତୁଷ୍ଟ ହୋଇ ଅଭିଯୋଗକାରୀ ଭିଜିଲାନ୍ସ କର୍ତ୍ତୃପକ୍ଷଙ୍କୁ ଜଣାଇଥିଲେ। ଏହାପରେ ଓଡ଼ିଶା ଭିଜିଲାନ୍ସର ଏକ ଟିମ୍ ଶୁକ୍ରବାର ପାଟଣା ତହସିଲ କାର୍ଯ୍ୟାଳୟର ଗ୍ୟାରେଜ୍ ନିକଟରେ ଜାଲ ବିଛାଇଥିଲା। ସେଠାରେ ଅଭିଯୋଗକାରୀଙ୍କଠାରୁ ୬୦୦୦ ଟଙ୍କା ଲାଞ୍ଚ ଗ୍ରହଣ କରୁଥିବା ସମୟରେ କନିଷ୍ଠ ରାଜସ୍ଵ ସହାୟକ ଉମାଶଙ୍କରଙ୍କୁ ଭିଜିଲାନ୍ସ ଟିମ୍ ଧରିଥିଲା।
ତାଙ୍କଠାରୁ ସମ୍ପୂର୍ଣ୍ଣ ୬୦୦୦ ଟଙ୍କାର ଲାଞ୍ଚ ଟଙ୍କା ଜବତ କରାଯାଇଛି। ଟ୍ରାପ୍ ପରେ ଉମାଶଙ୍କରଙ୍କ ସହ ସମ୍ପର୍କିତ ଦୁଇଟି ସ୍ଥାନରେ ଆୟବହିର୍ଭୂତ ସମ୍ପତ୍ତି  ଦିଗରୁ ଏକକାଳୀନ ତଲାସି ଚାଲିଥିବା ଜଣାପଡ଼ିଛି। ଏହି ଘଟଣାରେ ବାଲେଶ୍ୱର ଭିଜିଲାନ୍ସ ଥାନା କେସ୍ ନଂ-୧୭/୨୦୨୬, ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ର ଧାରା ୭ ଅନୁଯାୟୀ ମାମଲା ରୁଜୁ ହୋଇଛି। ଅଭିଯୁକ୍ତ କନିଷ୍ଠ ରାଜସ୍ଵ ସହାୟକ ଉମାଶଙ୍କରଙ୍କ ବିରୋଧରେ ଅଧିକ ତଦନ୍ତ ଜାରି ରହିଛି।