କେନ୍ଦୁଝର ସାଇନ (ଜ୍ଞାନରଞ୍ଜନ ମିଶ୍ର): ରାଉରକେଲା ସହରରେ ବହୁଚର୍ଚ୍ଚିତ ପାନପୋଷ ସର୍କିଟ ହାଉସ୍ରୁ ବନ୍ଧୁକ ଜବତ ଓ ଅପରାଧୀ ଗିରଫ ଘଟଣାର ମାଷ୍ଟର ମାଇଣ୍ଡ ପଳାତକ ପ୍ରକାଶ ପାଶ୍ୱାନକୁ ପୁଲିସ ବିହାରରୁ ଗିରଫ ପରେ ଓଡ଼ିଶାକୁ ଆଣିଛି। ତାଙ୍କ ସ୍ବାସ୍ଥ୍ୟ ପରୀକ୍ଷା ପରେ ଅଦାଲତରେ ହାଜର କରାଯାଇଥିଲା। ଜାମିନ ନାମଞ୍ଜୁର ହେବାରୁ ଗୁରୁବାର ବିଳମ୍ବିତ ରାତିରେ ତାଙ୍କୁ ଜେଲ ପଠାଇ ଦିଆଯାଇଛି। ତାଙ୍କୁ ବିଚାର ବିଭାଗୀୟ ହାଜତକୁ ପଠା ଯାଇଥିବା ବେଳେ ପୁଲିସ ରିମାଣ୍ଡରେ ଆଣି ଜେରା କରିବ ବୋଲି ସୂଚନା ମିଳିଛି।
ପ୍ରକାଶ ନେପାଳ ଫେରାର ହେବାକୁ ଯୋଜନା କରୁଥିବା ବେଳେ ବୁଧବାର ବିହାର ସମସ୍ତୀପୁରରୁ ବିହାର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ତାଙ୍କୁ ଗିରଫ କରିଥିଲା। ସେଠାକାର କୋର୍ଟରେ ହାଜର ପରେ ଗୁରୁବାର ତାକୁ ରାଉରକେଲା ଅଣାଯାଇ ବିଳମ୍ବିତ ରାତିରେ କୋର୍ଟ ଚାଲାଣ କରାଯାଇଛି। ପରେ ତାକୁ ରିମାଣ୍ଡରେ ଆଣି ସର୍କିଟ ହାଉସ୍ ପ୍ରକରଣରେ ଜେରା କରିବ। ପ୍ରକାଶଙ୍କ ବିରୋଧରେ ଜାତୀୟ ନିରାପତ୍ତା ଆଇନ ଲାଗୁ କରିବାକୁ ପୁଲିସ ଚିନ୍ତା କରୁଥିବା ଏକ ବିଶ୍ୱସ୍ତସୂତ୍ରରୁ ସୂଚନା ମିଳିଛି। ଅନ୍ୟପକ୍ଷରେ ହାଇକୋର୍ଟରେ ଆଗୁଆ ଜାମିନ ଆବେଦନ କରିଥିବାରୁ ପୁଲିସ ପ୍ରକାଶଙ୍କ ବିରୋଧରେ ଥିବା ୨୦ରୁ ଅଧିକ ମାମଲାର କେଶ ଡାଏରୀ ଦାଖଲ କରିଛି।
ପାନପୋଷ ସର୍କିଟ ହାଉସ୍ରୁ ୪ଟି ବନ୍ଧୁକ ଓ ୯ ରାଉଣ୍ଡ ଗୁଳି ଜବତ ହେବା ସହରର କୁଖ୍ୟାତ ଅପରାଧୀମାନଙ୍କୁ ସଙ୍ଗଠିତ କରି ଅପରାଧ ଘଟାଇବା ଯୋଜନାରେ ପ୍ରକାଶ ମୁଖ୍ୟ କାର୍ପଟଦାର ଥିବା ଅଭିଯୋଗ ଆଧାରରେ ପୁଲିସ ତା’ ବିରୋଧରେ ମାମଲା ରୁଜୁ କରିଛି। ଚଳିତମାସ ୧୪ ତାରିଖରେ ରଘୁନାଥପାଲି ପୁଲିସ ପାନପୋଷ ସର୍କିଟ ହାଉସ୍ରୁ ଅଭିଯୁକ୍ତମାନଙ୍କୁ ଗିରଫ କରିବା ପରେ ସମଗ୍ର ଘଟଣା ଉପରୁ କ୍ରମଶଃ ପରଦା ହଟିବାରେ ଲାଗିଥିଲା। ପ୍ରକାଶ ଅପରାଧୀଙ୍କ ଦ୍ୱାରା ‘ଟାର୍ଗେଟ କିଲିଂ’ ଯୋଜନା କରୁଥିବା ସହରରେ ଚର୍ଚ୍ଚା ହୋଇଥିଲା। ବିଜେପିର ପ୍ରକାଶ ଜଣେ ସକ୍ରିୟ ସଦସ୍ୟ। ପୁଣି ସେ ସୁନ୍ଦରଗଡ଼ ସାଂସଦ ତଥା କେନ୍ଦ୍ର ଆଦିବାସୀ ମନ୍ତ୍ରୀ ଜୁଏଲ ଓରାମଙ୍କ ମହାନଗର ନିଗମ ପ୍ରତିନିଧି ଥିବାରୁ ଦଳରେ ରାଉରକେଲାରୁ ରାଜଧାନୀ ପର୍ଯ୍ୟନ୍ତ ଚର୍ଚ୍ଚାର ବିଷୟ ହୋଇଥିଲା।
ଏହି ଘଟଣାର ପ୍ରାୟ ୧୦ ଦିନ ପରେ ବିଜେପି ପ୍ରକାଶକୁ ଦଳରୁ ନିଲମ୍ବିତ କରିଛି। ସର୍କିଟ ହାଉସ୍ ରୁମ୍ ବୁକ୍ କରିବା ସହିତ ଅପରାଧୀମାନଙ୍କ ସହିତ ପ୍ରତ୍ୟକ୍ଷ ସମ୍ପର୍କରେ ଥିବା ପୁଲିସ ପ୍ରମାଣ ପାଇଲା ପରେ ଗିରଫ କରିବାକୁ ଉଦ୍ୟମ ଚଳାଇଥିଲା। ମାତ୍ର ଗିରଫଦାରୀ ଭୟରେ ସେ ସହରରୁ ଗତ ୧୯ ତାରିଖରେ ଚମ୍ପଟ୍ ମାରିଥିଲା। ରାଉରକେଲାରୁ ସେ ରାଞ୍ଚି ପଳାଇ ଥିଲା। ପୁଲିସ ତା’ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି କରିଥିଲା। ପ୍ରକାଶ ରାଞ୍ଚିରୁ ନୂଆଦିଲ୍ଲୀ, ରାଜସ୍ଥାନର ଜୟପୁର ଆଦି ସହରରେ କିଛି ଦିନ ହେଲା ଘୁରି ବୁଲିଥିଲା। ମାତ୍ର ରାଉରକେଲା ପୁଲିସର ୪ଟି ସ୍ୱତନ୍ତ୍ର ଟିମ୍ ତା’ର ପିଛା କରୁଥିଲା।
ପୁଲିସ ହାତରୁ ବଞ୍ଚିବା ପାଇଁ ବିହାର ସମସ୍ତିପୁର ଦେଇ ପ୍ରକାଶ ନେପାଳ ଖସି ଯିବାକୁ ଯୋଜନା କରୁଥିଲା। ସମସ୍ତିପୁର ନୌରୀନ ରେଳ ଷ୍ଟେସନରେ ପ୍ରକାଶ ଟ୍ରେନକୁ ଅପେକ୍ଷା କରିଥିବା ବେଳେ ବିହାର ଏସ୍ଟିଏଫ୍ ହାତରେ ଧରା ପଡ଼ିଯାଇଥିଲା। ବିହାର ପୁଲିସର ସୂଚନା ଆଧାରରେ ବୁଧବାର ରାତିରେ ରାଉରକେଲା ପୁଲିସର ଆଉ ଦୁଇଟି ଟିମ୍ ସେଠାରେ ପହଞ୍ଚି ଗୁରୁବାର ସକାଳେ ସେଠାକାର କୋର୍ଟରେ ହାଜର କରାଇ ରାଉରକେଲାରେ ପହଞ୍ଚିବା ପରେ ବିଳମ୍ୱିତ ରାତିରେ କୋର୍ଟ ଚାଲାଣ କରିବା ରାଉରକେଲା ସହରରେ ଚର୍ଚ୍ଚାର ବିଷୟ ହୋଇଛି ।
