କେନ୍ଦୁଝର ସାଇନ (ଜ୍ଞାନରଞ୍ଜନ ମିଶ୍ର): ଓଡ଼ିଶାର ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଏକ ସଡ଼କ ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଛନ୍ତି। କେନ୍ଦୁଝର ଦେଇ ୪୯ନଂ ଜାତୀୟ ରାଜପଥରେ ମୟୂରଭଞ୍ଜ ଜିଲାକୁ ଯାଉଥିବା ସମୟରେ ତେଲକୋଇ ଥାନା ଅନ୍ତର୍ଗତ ଜଗମୋହନପୁର ନିକଟରେ ମନ୍ତ୍ରୀଙ୍କ ସରକାରୀ ଗାଡ଼ି ଦୁର୍ଘଟଣାଗ୍ରସ୍ତ ହୋଇଛି। ଗୁରୁବାର ସନ୍ଧ୍ୟା ପ୍ରାୟ ୫.୪୫ ମିନିଟରେ ଏହି ଅଘଟଣ ଘଟିଥିବା ସୂଚନା ମିଳିଛି।
ସୂଚନା ଅନୁଯାୟୀ ଜାତୀୟ ରାଜପଥରେ ଯାଉଥିବା ବେଳେ ଜଗମୋହନପୁର ନିକଟରେ ଥିବା ଏକ ସ୍ପିଡ ବ୍ରେକର୍ (ହମ୍ପସ) ଯୋଗୁଁ ଆଗରେ ଯାଉଥିବା ପାଇଲଟ ଗାଡ଼ିଟି ହଠାତ ବ୍ରେକ ମାରି ଅଟକି ଯାଇଥିଲା। ଫଳରେ ପଛରେ ସେହି ସମାନ ବେଗରେ ଆସୁଥିବା ସ୍ବାସ୍ଥ୍ୟମନ୍ତ୍ରୀଙ୍କ କାର ନିୟନ୍ତ୍ରଣ ହରାଇ ପାଇଲଟ ଗାଡ଼ି ପଛରେ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ମନ୍ତ୍ରୀଙ୍କ ଗାଡ଼ିର ସୁରକ୍ଷା ବେଲୁନ (Airbag) ତୁରନ୍ତ ଖୋଲି ଯାଇଥିଲା, ଯାହା ଫଳରେ ମନ୍ତ୍ରୀଙ୍କ ସମେତ କାରରେ ଥିବା ଅନ୍ୟ ସଦସ୍ୟ ଏକ ବଡ଼ ଦୁର୍ଘଟଣାରୁ ରକ୍ଷା ପାଇ ଯାଇଛନ୍ତି।
ଘଟଣା ସମ୍ପର୍କରେ ତେଲକୋଇ ଥାନା ଅଧିକାରୀ ଅଞ୍ଜନ କୁମାର ପାତ୍ର କହିଛନ୍ତି ଯେ, ଏହା ଏକ ସାମାନ୍ୟ ଦୁର୍ଘଟଣା ଏବଂ ଗାଡ଼ିରେ ଥିବା ସମସ୍ତ ବ୍ୟକ୍ତି ସୁରକ୍ଷିତ ଅଛନ୍ତି। ମନ୍ତ୍ରୀ ମୁକେଶ ମହାଲିଙ୍ଗ ସାମାନ୍ୟ ଆହତ ହୋଇଥିଲେ ହେଁ ସମ୍ପୂର୍ଣ୍ଣ ବିପଦମୁକ୍ତ ଅଛନ୍ତି। ଦୁର୍ଘଟଣା ଖବରପାଇ ସ୍ଥାନୀୟ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ କରିଥିଲା। ଏହାପରେ ମନ୍ତ୍ରୀଙ୍କୁ ପଛରେ ଆସୁଥିବା ଅନ୍ୟ ଏକ ଗାଡ଼ି ସାହାଯ୍ୟରେ ମୟୁରଭଞ୍ଜ ଅଭିମୁଖେ ପଠାଯାଇଛି।
ଜାତୀୟ ରାଜପଥ ଉପରେ ଏଭଳି ବାଆଇନ ସ୍ପିଡ ବ୍ରେକର୍ ବା ହମ୍ପସ ନିର୍ମାଣ ଯୋଗୁଁ ଅନେକ ସମୟରେ ଦୁର୍ଘଟଣା ଘଟି ବ୍ୟାପକ ଧନ ଜୀବନ ହାନୀ ହେଉଛି । କିଛି ମାସ ପୂର୍ବେ ଏଠାରେ ଏକ ସଡ଼କ ଦୁର୍ଘଟଣାରେ ୩ଜଣଙ୍କ ଜୀବନ ଯାଇଥିଲା, ଯାହାକୁ ନେଇ ସ୍ଥାନୀୟ ଲୋକେ ରାସ୍ତାରୋକ କରି ହମ୍ପସ ନିର୍ମାଣ କରିଥିଲେ। ତେବେ ବର୍ତ୍ତମାନ ଏହି ହମ୍ପସ ଯୋଗୁଁ ଅନେକ ସମୟରେ ଦୁର୍ଘଟଣା ଘଟୁଥିବାରୁ ଯାତାୟାତ ଅସୁରକ୍ଷିତ ହୋଇ ପଡ଼ୁଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଦୁର୍ଘଟଣା ପରେ ରାସ୍ତାରେ ସ୍ଥାନୀୟ ଲୋକଙ୍କ ଉତ୍ତେଜନା ପ୍ରକାଶ ପାଇବା ସହ କିଛି ସମୟ ପାଇଁ ଯାତାୟାତ ବାଧାପ୍ରାପ୍ତ ହୋଇଥିଲା। ପୋଲିସ ଦୁର୍ଘଟଣାଗ୍ରସ୍ତ ଗାଡ଼ିକୁ ଜବତ କରି ରାସ୍ତାରୁ ହଟାଇବା ପରେ ଯାନବାହନ ଚଳାଚଳ ସ୍ବାଭାବିକ ହୋଇଥିଲା ।
